Söwdegär, bezirgen, jahankeşdeler,
Karardan aýrylar ýollara sary.
Dünýäni eýeläp ol öten Karun,
Gözün ýumup diýer: «Mallara sary».

Pelegiň üstünden hökmün ýöreden,
Gudrat bilen ynsy-jynsy döreden,
Demin urup, dagy-daşy ereden,
Dahan açyp barmyş dillere sary.

Ýedi gün aglaýyp, gözünden galan,
Kyrk ineri tirkäp, rowana bolan,
Lagl gözläp, tylla, misden uýalan,
Ussa Jagfar[1] aýdar: «Illere sary».

Günäsiz bendeler Hakyň ýanynda,
Azazyl galtaşar magşar gününde,
Bir närse goýan dek adam janynda,
Ezraýyl ugramyş illere sary.

Abady az bolan dünýä weýrany,
Dargatdy bazaryn, ýapdy dükany,
Älem intizardyr arap zybany,
Her kes istäp diýer dillere sary.

Weýrana dönüpdir ne gözel iller,
Solup zagpyran dek lam-elip biller,
Andalypsyz bagda ýetişen güller,
Goýnuny açarmyş ýellere sary.

Daglar kemerinden turan dumanym,
Egsildiň, göteriň meniň pyganym,
Magtymguly aýdar, dostum-ýaranym,
Däli göwün diýer çöllere sary.

[1] Golýazmada säwlik bilen “Jepbar” ýazylypdyr.