Köňül şährine ot saldy,
Wah, neýleý, nary dilberiň.
Etrapymy duman aldy,
Gelendir gahry dilberiň.

Adam nesli däldir meger,
Hüýri-gulman başyn eger,
Handan eýläp, bize deger, 
Gorkaram, mary dilberiň.

Göwher, ýakut ýar boýnunda,
Pelek lerzandyr oýnunda,
Ýetişipdir ýar goýnunda,
Pynhandyr nary dilberiň.

Oldur aşyklar ataşy,
Eripdir Mejnunyň ýaşy,
Kenizidir hem syrdaşy −
Behiştiň hüýri dilberiň.

Ýandy, goja, ýürek ýaraň,
Hyrydary sen biçäräň,
Magtymguly − bagty garaň,
Namysy, ary dilberiň.