Dostlarym, göwnüm içinde dowzahyň suzanydyr,
Istemez men ol ataşy, neýleý, Hakyň permanydyr.

Pany jahan gyrgysynyň penjesinde galmyşam,
Gyrgy ähliniň içinde ýamanlar ýamanydyr.

Merdi oýnar boldy pelek ilde ryswa eýleýip,
Pany dünýä gerdişi − namartlar döwranydyr.

Ömrümiň her bir güni öter boldy elem bilen,
Salym etrapy pelegiň bir gussa gerdanydyr.

Adam oglun bijin kimin, pelek her dem oýnaýar,
Ol Hakyň pelek üçin ýaradan haýwanydyr.

Günde ýüz katla öter men umman Hazar etrapydan,
Neýleýin bu däli göwnüm pelek natuwanydyr.

Ne işleri kylar boldy ol Hakyň dergahynda,
Pelegiň bu kärine jümle-jahan haýranydyr.

Magtymguly, söz diýeňde, söz ahyryn aňlagyn,
Erse Azazyly şeýtan kylan ol zybanydyr.