Eý, Kerimi-kärisaz,
Günähim güzeşt eýle.
Eý, Rahymy-çäresaz,
Günähim güzeşt eýle.

Ermese kerem Senden,
Gitdi ygtyýar menden,
Jürmüm çykardym çenden,
Günähim güzeşt eýle.

Ýüz gam birle tende jan,
Isteýir Senden aman,
Pazlyň birle, ýa, Suhan,
Günähim güzeşt eýle.

Gerçe oldum günäkär,
Setr eýle aýbym, Setdar,
Kerem eýle, ýa, Gapbar,
Günähim güzeşt eýle.

Lutpuňy yzhar eýleý,
Köňlümi karar eýleý,
Towfykyňy ýar eýleý,
Günähim güzeşt eýle.

Akyl ýetmez zatyňa,
Pikr ermez sypatyňa,
Birligiň hormatyna,
Günähim güzeşt eýle.

Mäligi-mahluk, her ne,
Kim ýetdi sunguň syrna,
Üç müň ismiň hatyrna,
Günähim güzeşt eýle.

Biz biçäre ymmatyň,
Ymmaty-Muhammediň,
Hormatyna Ahmediň,
Günähim güzeşt eýle.

Sunguň düşüp şowkuna,
Etdiň Ahmet zowkuna,
Asman, zemin hakyna,
Günähim güzeşt eýle.

Sahylar yhsany çün,
Şehitleriň gany çün,
Jünbendeler jany çün,
Günähim güzeşt eýle.

Saňa bakan ýüzler çün,
Sen diýp ýyglan gözler çün,
Hamdyň okan sözler çün,
Günähim güzeşt eýle.

Gökde ýyldyz hormaty,
Ýerde nowruz hormaty,
Gije-gündiz hormaty,
Günähim güzeşt eýle.

Belent daglar hakyna,
Çölde gyrlar hakyna,
Ýerler, suwlar hakyna,
Günähim güzeşt eýle.

Senden bolmasa haraý,
Bu meniň halymga, waý,
Pyragy diýr, ýa, Hudaý,
Günähim güzeşt eýle.