Bir gije ýatyrdym, şa Nagyşbendi −
Bahaweddin atly diwana geldi.
Hasasyn süýreýip gelmiş Buhardan,
Hak yşkyna mest-u mestana geldi.

Birniçesi ýar-u ýaran durdular,
Mejlisler uzandy, halka gurdular,
Nagralar çekdiler, semag urdular,
Sedalar düzüldi, jan-jana geldi.

Gowga gopdy, rehmet boýandy düzler,
Saçyldy gan ýaşlar, açyldy gözler,
Ýygyldy derwüşler, döküldi paýzlar,
Göýä diýr sen ahyrzamana geldi.

Okar bolsa, ylmy-ledun açygly,
Hem diwana, hem beňňi, hem içigli,
Golunda käsesi başdan geçigli,
Synamda goýdular, bir şana geldi.

Magtymguly aýdar, Gurhana uýdum,
Gybaty taşladym, haramy goýdum,
Sygryna bilmedim, syrymy diýdim,
Saklana bilmedim, zybana geldi.