Dört müň dört ýüz ýaşan Lukman hekimiň,
Başy gara guma batdy, ýaranlar.
Kerk bedewli, agyr gürzli Rüstemiň,
Ajal jylawyndan tutdy, ýaranlar.

Ýusubyň arzuwy Ýakup ýanynda,
Söýgüsi bagrynda, derdi janynda,
Kimiň gadry bardyr çarhyň ýanynda,
Ýusuby gul edip satdy, ýaranlar.

Äleme hökm eden Isgender soltan,
Ajal tedbirine tapmady derman,
Tagtyny ýel çeken hökmi-Süleýman,
Dünýäde galmady, ötdi ýaranlar.

Üç ýüz on üç mursal galmady biri,
Hany Asaf − Süleýmanyň weziri?
Hany ol Hak Resul, Hakyň Öz şiri,
Gara ýer hemmesin ýuwtdy, ýaranlar.

Magtymguly aýdar, gapyl oturmaň,
Gylça jany uzyn gaýga batyrmaň,
Ýalançyny hasrat bilen ötürmäň,
Bir pasyl döwrandyr, ötdi, ýaranlar.