Bady-saba, arzymy ol ýowuz dogana aýt,
Elmydam zar eýlegen, gözleri hun-gana aýt.
Şum pelegiň golundan gitgen ol-janana aýt,
Aýra düşüp, gam çeken, garabagt hana aýt,
Dünýäden armanly bolgan ol pahyr perwana aýt.

Ne bolupdyr, ne sebäpdir, görmerem men ýüzüni,
Gara ganlara boýap oturmyş ki gözüni,
Bizaram mal-u mülkden, ger eştmesem sözüni,
Nirde gapyl eýleýip, bent kyldyň sen özüni,
Derdimiň yzharyny ol emin-Lukmana aýt.

Bizleriden ýat kylyp, bent eýlediň ki dilini,
Ata-eneden aýyryp, üzdüň-eý, sen bilini,
Hijrana rowaç eýleýip, ýatyryp sen ýelini,
Agtaram, çaý tapmaýan, iki gözüm silini,
Jany-aramyň takaty ol beýik ummana aýt.

Kyldylar käbämi weýran, ýokdur indi gaçarym,
Çykdy gitdi gollarymdan jan şährimiň açarym,
Üzdüler bu ganatymy, ýokdur-eý meýl uçarym,
Düşdi talaň hazynaga, gutardy mal saçarym,
Halymyň bu teňligin egsilmez dükana aýt.

Haka arzym budur, eý, dost, kylsyn azat gardaşy,
Akyban, derýaga döndi, möwç urup gözler ýaşy,
Goýdy alnyma getirip, pelek aýralyk aşy,
Diý, niçik zar kylmasyn Pyragy, ýokdur syrdaşy,
Iki dünýä geregim, arzuwly imana aýt.