Boýadylar köýnegiňi gan bile,
Ady belli, arap dilli, söwdügim.
Aýralykda ýandy ataň jan bile,
Ady belli, arap dilli, söwdügim,
Şam abaly, Rum kabaly jananym.

Aglaý-aglaý jepalaryň derdinden,
Gorka-gorka sähralaryň gurdundan,
Aýryldyň ataňdan, Kengan ýurdundan,
Ady belli, arap dilli, söwdügim,
Şam abaly, Rum kabaly jananym.

Çyplak oldy gül bedeniň soýuldy,
Dagy-hyjran synaň üzre goýuldy,
Ýyglamakdan Ýakup gözi oýuldy,
Ady belli, arap dilli, söwdügim,
Şam abaly, Rum kabaly jananym.

Geldi ol dem gardaşlaryň bögürşip,
Gorkusyndan gurtlar geldi ýügürşip,
Gelen guduk üste durdy telmurşyp,
Ady belli, arap dilli, söwdügim,
Şam abaly, Rum kabaly jananym.

Magtymguly aýdar, älem bakyldy,
Pelek seni Müsre aldy, çekildi,
Puşman edip, aýagyňa ýykyldy,
Ady belli, arap dilli, söwdügim,
Şam abaly, Rum kabaly jananym.