Giň göwräni gam basypdyr özünden,
Baş hem gelse, ýyglap geçer halyma.
Bagyr ýaşyn köňül döker gözünden,
Gaş hem gelse, ýyglap geçer halyma.

Garrylyga döndär ýigit çaglary,
Geda eýlär täç eýesi begleri,
Gurşun deý erider Kap dek daglary,
Daş hem gelse, ýyglap geçer halyma.

Älem içre bir ah ursam bir zarba,
Eda bolar ynsan, pil gelmez gurba,
Gaplaň güýçden galar, döner gurt gürbä,
Guş hem gelse, ýyglap geçer halyma.

Puşmanda men eden-etmiş kärimden,
Biperwaýam bolan-bolmuş barymdan,
Ýoldaş bolan ýata bilmez zarymdan,
Daş hem gelse, ýyglap geçer halyma.

Hak yşkydyr bizi goýan közlere,
Bu közlerdir kysmat bolan bizlere,
Bilbil dilsiz galar, barsam ýazlara,
Gyş hem gelse, ýyglap geçer halyma.

Aňlamaýan yşk derdiniň käninden,
Bu söz geçmez ýakynyndan-ýanyndan,
Yşka düşen umyt üzer janyndan,
Läş hem gelse, ýyglap geçer halyma.

Pähm eýleýen Magtymguly sözüni,
Derde düşüp, ýaşa doldyr gözüni,
Şat gülenler tuta bilmez özüni,
Hoş hem gelse, ýyglap geçer halyma.