Bilbilleri ýesir eden gül-handan,
Ýa, Rep, habar bilerinmi, ýar senden.
Ýedi yklym maňa görüner zyndan,
Ýa, Rep, habar bilerinmi, ýar senden.

Ispendiýar gözi Rüstem Zalynda,
Şam, Nejepde, Mekke, Dymaşk ilinde,
Arzy-Karsda, Kerbelanyň çölünde,
Ýa, Rep, habar bilerinmi, ýar senden.

Şerap içip, serhoş bolup, segresem,
Ganym janyn gyýym-gyýym dograsam,
Görogly dek dagdan-daga ugrasam,
Ýa, Rep, habar bilerinmi, ýar senden.

Bir gül kokar gözel ýaryň bagynda,
Bilbil hüjüm eýlär soly-sagynda,
Beýtullanyň Sapa, Merwe dagynda,
Ýa, Rep, habar bilerinmi, ýar senden.

Şyh Sengan deý uzyn gaýga ulansam,
Şibli kimin toz-topraga bulansam,
Käbä baryp, ýedi keret dolansam,
Ýa, Rep, habar bilerinmi, ýar senden.

 Ýusup kibi zyndan içre aglasam,
Jirjis kibi jan ýolunda çaglasam,
Ýunus kibi Haka gulluk baglasam,
Ýa, Rep, habar bilerinmi, ýar senden.

Doga kylyp, elim Göge galdyrsam,
Gül, Ferhar dek gyzyl meňzim soldursam,
Gopuz alyp, beýik nagra çaldyrsam,
Ýa, Rep, habar bilerinmi, ýar senden.

Isa kibi hylwat tutsam semada,
Idris kibi gulluk etsem zyýada,
Hydyr, Ylýas kibi girsem zulmata,
Ýa, Rep, habar bilerinmi, ýar senden.

Magtymguly, aşyklaryň mestinde,
Nerkes gözi haýran eder destinde,
Ýedi ýerde, dokuz pelek üstünde,
Ýa, Rep, habar bilerinmi, ýar senden.