Ýa, Habyp, Hak Resuly sen,
Çyn jandan söýmüşem seni.
Derwüşler gadyr gijesin,
Söýen dek söýmüşem seni.

Eýleýip seýr-u seýrany,
Keşt etsem külli Eýrany,
Misli Ybraýym Sarany,
Söýen dek söýmüşem seni.

Ýakup ýurt etdi Kengany,
Ogludyr Müsür soltany,
Misli Ýusup Züleýhany, 
Söýen dek söýmüşem seni.

Ýalançyny tutdy ady,
Olardyr yşkyň binýady,
Mejnun Leýli perizady
Söýen dek söýmüşem seni.

Dildi daglaryň zirini,
Tapmaýyn biri-birini,
Aşyk Perhat ol Şirini,
Söýen dek söýmüşem seni.

Egdi meni dünýe maly,
Bolmady yşkym kemaly,
Seýpelmelek Mahjemaly,
Söýen dek söýmüşem seni.

Basdy muhabbet nyşany,
Keşt eýledi çar köşäni,
Ýemende Warka Gülşany,
Söýen dek söýmüşem seni.

Gitdi elden ygtyýary,
Galmady namysy-ary,
Aşyk Nowruz, Gül-Ferhary,
Söýen dek söýmüşem seni.

Bir gün ýolukdylar Hyzra,
Durdular nyýaza, nezre,
Bir-birini Wamyk, Uzra,
Söýen dek söýmüşem seni.

Gezdiler Rumuň düzüni,
Berdiler Hakyň karzyny,
Aryzda Ganbar Arzyny,
Söýen dek söýmüşem seni.

Tutmady olar dünýäni,
Galmady ýary-ýarany,
Misli ol Tahyr Zöhräni,
Söýen dek söýmüşem seni.

Bu dünýä goýupdyr kimi,
Hoş tutuň bäş günlük demi,
Aşyk Garyp Şasenemi,
Söýen dek söýmüşem seni.

Magtymguly, dünýä pany,
Ötüpdir Rüstemler, hany?
Aý-Güni, Zemin-Asmany,
Söýen dek söýmüşem seni.