Jam göterip, baryp ýetdim bir bapdan,
Hyrka geýip, il içinde san bolsam.
Tün içinde baryp Beýtulla tapdan,
Zar ýyglaýan sahyplarda hun bolsam.

Abu Seýit, Omar Haýýam, Hemedany,
Firdöwsi, Nyzamy, Hapyz perwany,
Jelaleddin Rumy, Jamy elwany,
Olarnyň jaýynda menem kän bolsam.

Damegandan[1] ýörgen ussat Nowaýy,
«Çar diwany», «Perhat-Şirin», rubaýy,
Zahyreddin Babyr «Mizan-öwzany»,
Gaşlaryna baryp men Mejnun bolsam.

Okap bildim Sagdynyň men «Bossanny»,
Gör, ne ajap Hakanynyň «Mediany»,
Istär men «Şanama», «Sakynamany»,
Halyf Omar bilen Süleýman bolsam.

Salaman-Ebsaly serhoş eýleýip,
Bähram Gury tutup, mehruş eýleýip,
Azududdöwläni bir guş eýleýip,
Abu Mähfuz, Gyzyl Arslan han bolsam.

Abu Bekr gan ýyglap Farsda galsa,
Aly, Mamun, Abisdama (?) deň bolsa,
Zünnun baryp, ol Rüsteme zor salsa,
Rüstemiň derdine men derman bolsam.

Galen, Eflatuna ýolun görkezip,
Dawut, Osman bilen Aly ürküzip,
Kubat pederi Hysrowy gorkuzyp,
Olar diýgen bary din-iman bolsam.

Arbalet goluňda, eý Magtymguly,
Rüsteme Isgender hiç tutmaz ýoly,
Ne bolsa, bilgeý sen ilat hyýaly,
Dertliler alnynda men Lukman bolsam.

[1] Bu ýerde «Namengan» bolmagy mümkin, ähtimal säwlik gidendir.