Ýaranlar, gerdişi-çarhyň elinden,
Bu meniň ýüregim para-paradyr.
Syzzyldaşar tenim Eýýup teni dek,
Kişi bilmez, bir agyzsyz ýaradyr.

Gije-gündiz işim-güýjümdir haý-waý,
Telmuryp ýyglar men gözlenip her taý,
Uçraşyp kölüge: «Gark oldum – diýr – haý,
Ärler-pirler, sizden medet-haraýdyr».

Garyp eger garyp ýerde ýörijek,
Gözlerinden ganly ýaşlar ýörijek,
Aşyk eger magşugyny görijek,
Gül-güli açylar, köňli paraýdyr.

Tohum sal, orar sen, geldiň bu jaýa,
Ömrüňi geçirme bihuda-zaýa,
Nazar eýlär sizler uşbu dünýäýe,
Gelen geçer, durmaz, köne saraýdyr.

Magtymguly kylmyş jigerin birýan,
Ýürege gan dolmuş, bu çeşmi-girýan,
Şeýle ejiz galmyş, ýalbaryp her ýan,
Rehm eden bolmady, bagtym garadyr.