Ýigit halyň garrylyga,
Salaýyn diýseň, öýlengin.
Kethudalyk endişesin,
Kylaýyn diýseň, öýlengin.

Kethudalyk gözel ýoldur,
Gaýgy galdyrmaz, gam öldir,
Ýigitlik bir gyzyl güldür,
Solaýyn diýseň, öýlengin.

Öý, il gerek, ýorgan-düşek,
Perzent bentdir, aýal − duşak,
Ýüke werzişgär boz eşek,
Bolaýyn diýseň, öýlengin.

Gezer sen oýnap, dalaşyp,
Galar sen gama bulaşyp,
Hasrata, derde ulaşyp,
Galaýyn diýseň, öýlengin.

Joşgun eder sen özüňden,
Aýrylar sen hoş ýazyňdan,
Tükenmez derdiň yzyndan,
Ýeleýin diýseň, öýlengin.

Açyp ýigitlik zamanyn,
Getir garrylyk dumanyn,
Dünýäniň ýagşy, ýamanyn,
Bileýin diýseň, öýlengin.

Ýigitlik bir gyzyl gülşen,
Garrylykda öçer röwşen,
Gujak-gujak gara ýowşan,
Ýolaýyn diýseň, öýlengin.

Magtymguly, gezip her taý,
Etmezdiň jahanda perwaý,
Pygamber sünnetin berjaý,
Kylaýyn diýseň, öýlengin.