Neýleýin men, bu pelegiň zulmy bilen galmyşam,
Degdi sere, gitdi huşum, neýleýin, biçäreýem.
Bady-saba erdi geldi, urdy, janym, ölmüşem,
Degdi sere, gitdi huşum, neýleýin, biçäreýem.

Meňli hanym aldy gitdi jismim içre janymy,
Sormazdan ykbaly pelek ýapdy hijran donumy,
Bir näkese bagş eýlemiş pelek Meňli hanymy,
Degdi sere, gitdi huşum, neýleýin, biçäreýem.

Dana bolmaý keser huşum başdaşymdan aýrylyp,
Aklym çaşdy, serim boşdur, gör, huşumdan aýrylyp,
Ýowuz galyp, gan ýyglaram, gardaşymdan aýrylyp,
Degdi sere, gitdi huşum, neýleýin, biçäreýem.

Nesimini dabanyndan soýdular-da, goýdular,
Meni älem ryswa kylyp, iki gözüm oýdular,
Ilde-günde ýokdur ýüzüm, pynhanymy aýdylar,
Degdi sere, gitdi huşum, neýleýin, biçäreýem.

Magtymguly, ýedi yklym zar bilen gan ýyglaýyp,
Özüň gapyl eýleýip sen daýym pynhan ýyglaýyp,
Terk eýledi maly-mülküň gelip hijran ýyglaýyp,
Degdi sere, gitdi huşum, neýleýin, biçäreýem.