Dözmenem, doýmanam, durmanam, eý ýar,
Bu saky döwründe içmeýin jamym.
Jamy-meý sundugyň görmesin agýar,
Gelmenem aklyma görmeýin kämim.

Bolmuşam guwwas-u ýüzmüşem köli,
Tapmyşam hemrahy, tutmuşam ýoly,
Şowkuň şerabyndan bolmuşam däli,
Bilmen niçik geçer çäştim-u şamym.

Tä nepes tendedir, tende jan bardyr,
Dil saňa maýyldyr, çeşm intizardyr,
Çekdigim pygandyr, werzişim zardyr,
Tä ki bu dert ile geçer eýýamym.

Gözleriň jellatdyr, dilleriň aýýar,
Gamzaň bimar eder, ýüzleriň timar,
Mansur belasyna bolsam giriftar,
Giderem sen sary süýreýip hamym.

Magtymguly, hoş hap içre ýatyrdym,
Emriňe ugradym, iman getirdim,
Özümi unutdym, huşum ýitirdim,
«Pyragy» diýp çagyraý sen bu namym.