Eý-ä, dostlar, däli dünýä
Ýagşy günlerim har kyldy.
Iki ýüzli, loly dünýä,
Şady-horramym zar kyldy.

Başdan gerek ýar ýigide,
Dost tapylmaz dar ýigide,
Asly ýeke — är ýigide,
Zalym pelek, gör, zor kyldy.

Kimim bar eşitse derdim,
Tilki boldy peleň, gurdum,
Weýran boldy gözel ýurdum,
Gyzylbaş tary-mar kyldy.

Goldan gidendir dessanym,
Göýä tenden çykdy janym,
Gözi ýaşly Meňli hanym,
Ýüregim içre nar kyldy.

Atsyz galdy güýçli pälwan,
Beýle boldy, neýleý, zaman,
Özün hödürleýip juwan,
Kalbymda, görüň, mar kyldy.

Magtymguly, kes diliňi,
Bükerler elip biliňi,
Azara goýma iliňi,
Barysy ygtybar kyldy.