Şükür, alhamdulilla!
Janana gözüm düşdi.
Meýhanada meý içdim,
Messana gözüm düşdi.

Eý, zülpi, saçy anbar,
Mährap ki ýüzüň münber,
Eý, lagly-lebi göwher, 
Ummana gözüm düşdi.

Eý, gözleri ahramy,
Gel, gözlegil ýaramy,
Eý, köňlümiň aramy,
Imana gözüm düşdi.

Eý, jady jeren gözli,
Eý, şähd-u şeker sözli,
Eý, Şems-u Kamar ýüzli,
Tabana gözüm düşdi.

Arzuwda gezer iller,
Hyzmata geler gullar,
Täze açylan güller,
Bossana gözüm düşdi.

Her saçlary bir sünbül,
Göýä ki menem bilbil,
Eý, jennet era bir gül,
Ryzwana gözüm düşi.

Bu derdime sen derman,
Köýüňde bolam nalan,
Magtymguly diýr, eý jan,
Janana gözüm düşdi.