Ýagty salar gider zulmat tününde,
Meniň sahypjemalymy gördüňmi?
Bahar eýýamynda, heýhat gününde,
Meniň sahypjemalymy gördüňmi?

Anka sypat turup, «Hak!» diýp galkan guş,
Gijesi tirikdir, gündizi bihuş,
Nowaýy jindeli, egni hyrka puş,
Meniň sahypjemalymy gördüňmi?

Gan edipdir pelek bagrym pyrakda,
Elmydam gezer men ýar diýp sorakda,
Käbe etrapynda, Şamda, Yrakda,
Meniň sahypjemalymy gördüňmi?

Haremde, Gypjakda, Çynda-Maçynda,
Zemaýyl ornunda, Arşyň içinde,
Yklym degresinde, pelek burçunda,
Meniň sahypjemalymy gördüňmi?

Aşyklar ahynda, Gulzum döwründe,
Gubbatyl-yslamda, Jeýhun bahrynda,
Sidre sährasynda, Isa şährinde,
Meniň sahypjemalymy gördüňmi?

Hezret Aly etgeç älemge dawy,
Kapdan Kaba düşdi hezretiň çawy,
Ýa, yklym eýesi Ahmet Ýasawy,
Meniň sahypjemalymy gördüňmi?

Mesgen tutmuş gara dagyň burnunda,
Alynyň mülkünde, Isa ornunda,
Ýeriň arkasynda, gögüň garnynda,
Meniň sahypjemalymy gördüňmi?

Magtymguly çeker ýaryň gamyny,
Gezip, tapa bilmez roýy-zemini,
Ýa, ady Jebraýyl – Hakyň emini,
Meniň sahypjemalymy gördüňmi?