Jahyllygyň joşy çykdy başymdan,
Men ol joşdan haly bolup galyp men.
Bir gama ulaşdym, gitdim huşumdan,
Bu dert ile doly bolup galyp men.

Başym ýüz höwesde, köňlüm joşgunda,
Girdaba düşüp men däli daşgynda,
Nejt dagynda gezen Mejnun yşkynda,
Ýanar otly Leýli bolup galyp men.

Ýigitlik paslyny gyşa ýetirdim,
Kämillik kiştisin derýa batyrdym,
Beýik pikre galdym, aklym ýitirdim,
Tirik erken, öli bolup galyp men.

Bu dünýäni göçüp baran göç bildim,
Işini bet aňdym, özün puç bildim,
Öňün oýun gördüm, soňun hiç bildim,
Il içinde däli bolup galyp men.

Magtymguly, paş eýlegil sözüňi,
Pelek muşty-häk etmeýen gözüňi,
Bu wagta deň ýaş bilerdiň özüňni,
Imdi gör, bak, uly bolup galyp men.