Görsem, eý, Dilber, jemalyň, ygtyýarym galmaz-a,
Görmez ersem bir zaman, sabr-u kararym galmaz-a.
Waslyň umydyna bir dem ygtybarym galmaz-a,
Bolmasa umydy-waslyň, hiç mydarym galmaz-a.

Ger enaýat bolmasa Senden, açylmaz ýolumyz,
Tutgun olar daýyma, bolmaz küşat ykbalymyz,
Ejz ile bimar olup, aşufta bolgan halymyz,
Rehm edip, Sen sormasaň, bir aýry ýarym galmaz-a.

Hasrat içre galmyşam, ejiz boluban mande men,
Parh ede bilmen özüm eýwanda ýa weýranda men,
Kimse pähm etmez bu derdim, bolmuşam dermende men,
Sanyram ölmezden owwal tende janym galmaz-a.

Göýä ki beýtul-hazan men, şat gelen gamnäk ola,
Tä haýaty-panyýam, synam Seniň çün çäk ola,
Suratym nisýandadyr, ustuhanym häk ola,
Tä olynça rozy-magşar, ahy-zarym galmaz-a.

Gerçe bu Magtymgulydyr maýyly-nebsi-howa,
Hak erer Sen birligiň, çün hajatym kylgyl rowa,
Hajatym Senden rowa bolmaz erse ger, muddaga,
Beýle mälimdir ki, hiç bir gamgusarym galmaz-a.