Gam dumany basyp garyp köňlümi,
Göz ýaşyn saklamaý, döküp baradyr.
Kimdir rehm eýleýen, sorap halymy,
Bozuk köňlüm gören ýykyp baradyr.

Gerçe ot ýaksalar aşyk ýagyndan,
Ölüm asan bolar dost pyragyndan,
Hijran meni kowdy sabyr dagyndan,
Pyrak bogun-bogun söküp baradyr.

Ol döwri-döwranym çarh bulaşdyrdy,
Gam janym guratdy, ot tutaşdyrdy,
Yşk meni ýandyrdy, hetden aşdyrdy,
Ýüregim içimden çykyp baradyr.

Parahat ýatyrdym nebsimi besläp, 
Turdy köňlüm ýar jemalyn höwesläp,
Hakdan hajat diläp, myradyn isläp,
Gözüm ol ýollara bakyp baradyr.

Magtymguly, mejalym ýok söýläýin,
Dostlara derdimi aýan eýläýin,
Eý, ýaranlar, ýyglamaýyn neýläýin,
Yşk meni ýandyryp, ýakyp baradyr.