Ýüzüm ýar ýüzüne düşse, dilim alhamdulilladyr,
Eger gahryna ugraşsa, okyrym kulhuwalladyr.

Bu dergähi durar kurbet, erer ol hädiýi-wahdet,
Muhabbetiň makamynda onuň[1] az waspy löwladyr.

Pelekler nerdibanydyr, zemin saýasyna mätäç,
Iki nagleýni Arşyň kellesinde täji-agladyr.

Eger misgin, eger bir baý, taparmy sensizin hiç raý,
Ýamandyr aýralyk, eý-waý, arap labzynda weýladyr,

Jewaryňdan jydalara, köýüňde jan pidalara,
Seni istän gedalara zekat husnuňda öwladyr.

Erer men bir günäkäriň, hemişe aşyky-zaryň,
Ýüzün görmesem ol ýaryň, haçan köňlüm teselladyr.

Pyragy, niçe wagt oldy, habar tapmas men ol ýardan,
Ýanar men ataşy-yşka, bu ne terhos-töwelladyr.

[1] Bu ýerde Muhammet pygamber göz öňünde tutulýar.