Bir gije ýatyrdym, şa Nagyşbendi,
Keremi joş eýläp, bir nan getirdi.
Sag elinde gülgün bada şeraby,
Sol elinde täze birýan getirdi.

Oýandym ukudan, galdym düýşümden,
Haýran galdym Diwananyň işinden,
Badasyn noş eýläp, gitdim huşumdan,
Gam dideden eşki-girýan getirdi.

Jan hyruja geldi gaýnap-joşmadan,
Ýüregim möwç urdy dolup-daşmadan,
Bir yşarat boldy oňa düşmedim,
Pähm etmedim, janda arman getirdi.

Aňlamadym, boldum yşka hyrydar,
Bilmedim, istedim Dilberden didar,
Yşk derdine düşdüm, galdym giriftar,
Kimse bu dert üçin derman getirdi?

Magtymguly, turdum togap etmäge,
Dil perman bermedi jogap etmäge,
Yşk ähliniň halyn harap etmäge,
Aklyn alyp, mesti-haýran getirdi.