Dertli dilber, dilleşer sen, gel bäri,
Dullukdyr meniň-de bagrym dilenim.
Soraýyr men, men hem sen deý bir ýary,
Seni soramakda ýokdur ýalanym.

Eger geňeş salsam ýada-bilişe,
Diýrler: «Şirin asal ýaga gelişe»,
Säher, ýazygym çün tutsam nalyşa,
Owwal bir ýar bolar ýada salanym.

Bilen ýanda meňzär gymmat düre sen,
Tanymaza duşup, degme ýere sen,
Kadyr kysmat etse, maňa bara sen,
Seniň kimin ýardyr meniň ölenim.

Her dilber kim, köňlüm öýün ýarydar,
Ýatan bagtyn ol Ýaradan ýörüder,
Gargyşym daşlary mum deý erider,
Pür-pudak ýaýradar alkyş kylanym.

Gözel görküň gökde Günden aýynmaz,
Güli, dessembili ysgan doýunmaz,
Magtymguly, baş bermese baýynmaz,
Mährimi inderip, nazar salanym.