Kysmat olsa, gidem uzak ýollara,
Nesip goýmaz, gider ýolum baglar, heý.
Haýran-mejnun bolup, çykam çöllere,
Baryp, mesgen tutam sizi, daglar, heý.

Oýun bilen oglanlygyň deminden,
Ötdüm, geldim kämilligiň çeminden,
Köňlüm lerzan boldy dünýä gamyndan,
Tutdy synam çapraz-çapraz daglar, heý.

Gaýda-gaýda oglanlygyň raýyndan,
Ýetip geldim kämilligiň paýyndan,
Batdy başym, çyka bilmen laýyndan,
Ýada düşer öňki gezen çaglar, heý.

Jahyllykda çar tarapa atyşan,
Bilmezlikde hamu işe gatyşan,
Ejiz galyp, garrylyga ýetişen,
Öz-özünden dert edibän aglar, heý.

Many aňlan Magtymguly sözünden,
Pikre düşer, ýaşlar akar gözünden,
Hemme zatlar tagýyr tapar özünden,
Ýa, Rep, ýykylmazmy beýik daglar, heý.