Gitdi gözlerim röwşeni, şirin jandan aýrylyp,
Tagty-bagtym boldy weýran, şa-jahandan aýrylyp.
Soldy bagym gülleri, anbar-reýhandan aýrylyp,
Kyldy jeňňi ol rakyplar, zor pälwandan aýrylyp,
Gitdi sabrym-takatym mähribandan aýrylyp.

Dadyma hiç kimse ýetmez, bir ýazykly gul menem,
Suw gadryn balyk biler, gadry bilinmez sil menem,
Zähri jandarlar iýerler, zähri-katyl bal menem,
Andalybyn aldyran şol bagty gara gül menem,
Gitdi sabrym-takatym mähribandan aýrylyp.

Ähli beýtin ýyglaşar, nalasy Arşa ýetip,
Bendi kyldy men pakyry, görgül ol pelek tutup,
Etdi illere wejera, kylyban oýun edip,
Ýollady hijran şährine, ol ajal peýman satyp,
Gitdi sabrym-takatym, mähribandan aýrylyp.

Ýagşy diýip gol uranym, çykdy bagtyma ýaman,
Depmişem bedew diýip, gör, eşek olmuşdyr çaman,
Dökdi nurun ol pelek, zäheri ýere daman,
Bu halyma rehmi inip, aglady şähri-Ýemen,
Gitdi sabrym-takatym mähribandan aýrylyp.

Gözlerimden uçdy ruhy, göýäki ýaz ýagmyry,
Bakdym ykbalyma açyp, kylmadym men sabyry,
Toba kyldym gara bagtym, eý Hak, algyl ömüri,
Gözlemeý ahyryn işiň, nara saldym bagyry,
Gitdi sabrym-takatym, mähribandan aýrylyp.

Diňlemez arzymy ol Hak, mende, dostum, çäre ýok,
Eredi janym-jigerim, görgül, tende ýara ýok,
Berdiň ynsana azary, ne pelekde para ýok,
Diýr Pyragy, ne deňsizlik, bu hijranda gara ýok,
Gitdi sabrym-takatym mähribandan aýrylyp.