Kerem etseň, Kadyr Taňrym,
Dünýälikden at islärin.
Talygym ukuda galmyş,
Bir açylmyş bagt islärin.

Ýoksullyk bir ýaman ýoldur,
Pakyr menem, golum galdyr,
Halal ryzk ber, kesp bildir,
Kimýa atlyg ot islärin.

Ýalan dünýäde ýörmäge,
Döwlet ber eşret sürmäge,
Ömür ekläp, gün görmäge,
Segsen ýyl nurbat islärin.

Hajy Bekdaş, Abdylkadyr,
Hoja Ahmet, Ymam Ryzadyr,
Feridun bir öwlüýädir,
Baryndan hümmet islärin.

Pyragy, yşka ugraşdym,
Derýa girdim, möwje düşdüm,
Hor galmasyn puştdyr-puşdum,
Berkarar döwlet islärin.