Eý, ýaranlar, bir ýüzi gül, Aýa aşyk bolmuşam,
Barçalar maksudy – gül ragnaýa aşyk bolmuşam.
Bilbilem, bag içre bir gowgaýa aşyk bolmuşam,
Özi gaýyp, zülpleri ýeldaýa aşyk bolmuşam,
Menzilim dag içredir, sähraýa aşyk bolmuşam.

Çün pelek saldy meni ol gün pena topragyna,
Düşdi seýrim, daýyma, Mekge, Medine dagyna,
Bilbil oldum, saýradym, girdim Eremiň bagyna,
Paýy-bent oldum o gün gam iliniň tusdagyna
Ýüz bela-mähnetli bir söwdaýa aşyk bolmuşam.

Göwräm içre ýar gamydyr, menzilim sährada, heý,
Puşeşim gam-gussadyr, men dönmüşem Perhada, heý,
Saldy yşkyň, dilber-ä, jany-jigerim oda, heý,
Wadaryg-a, geçdi ömrüm zaýa berdim bada, heý,
Ahy çoh, efgany çoh, bir köýe aşyk bolmuşam.

Bilmenem, ol ne bahrdyr, ne mugazzam dagydyr,
Aldy köňlüm, gitdi aklym, ten mydam nä çagydyr,
Ony nisbet etmek olmaz, gumry, bilbil, zagydyr,
Aý garaz her zülpüne, ýetmiş müň är tussagydyr,
Kaddy-kamaty belent, zybaýa aşyk bolmuşam.

Dost, howaýy-waslyňy men şunça çyndan isterem,
Damy-zülpüň kaýdyna özümi zyndan isterem,
Diýme: «Gamdan bir zaman köňlümi handan isterem»,
Bir garyp aşyk menem, ýar, seni senden isterem,
Gije-ýu gündiz, biliň, hüw-haýa aşyk bolmuşam.

Galmyşam haýran olup, aýry mydarym ýok meniň,
Aldy janym yşkyň ody, ygtyýarym ýok meniň,
Tende jan perwaz eder aýry durarym ýok meniň,
Gelse, aklym dagydar, gitse kararym ýok meniň,
Gamzasy ok, gaşlary ol ýaýa aşyk bolmuşam.

Aýdadyr Magtymguly, men onda käne ugradym,
Seýr edip bardym pelege, lämekana ugradym,
Çün meni ryswa kylan yşky-ýegana ugradym.
Ýetmiş iki şähr[1] içinde müň bir dükana[2] ugradym,
Şunça sergerdan-sepil-u zaýa aşyk bolmuşam.

[1] Bu ýerde ýetmiş iki şäher diýmek bilen, hadyslarda getirilýän ýetmiş iki pyrka (akym) göz öňünde tutulýar hem-de şol akymlaryň ählisiniň öňe sürýän pikirlerinden habarlydygy ýaňzydylýar.

[2] Bu ýerde müň bir dükan diýmek bilen Hudaýyň müň bir ady göz öňünde tutulýar.