Üz umydyň özün bilmez adamdan,
Aňlamaz ol, a:m-u hasy näbilsin.
Ne tama bar çakyr içen gedemden,
Buzahor ýagşyny, ýasy näbilsin.

Ýamana ýagşy söz ýokmaz, taşlanar,
Aňlar äriň aňlamasy güýçlener,
It ýalyn topraga dökseň hoşlanar,
Topragy, tabagy, tasy näbilsin.

Butparaz müň kylsa roza-namazy,
Oňa nesip bolmaz behişdiň ýazy,
Älemi göterse ebriň owazy,
Eşitmez, ker pakyr sesi näbilsin.

Diňle sözüm, ner zarbyny ner tanyr,
Har bakan har tanyr, mähek zer tanyr,
Eý, ýaranlar, är ýigidi är tanyr,
Hatynlar ýagşyny, pisi näbilsin.

Magtymguly aýdar, sözlerim hakdyr,
Emma ki hak söze ten beren ýokdur,
Bir gözli diýmese, garadyr, akdyr,
Kör pakyr kümüşi, misi näbilsin.