Gördük saýy köňül sowar,
Sabyrsyz-kararsyz ärden.
Yssy beren köpek ýegdir
Uýatsyz-ykrarsyz ärden.

Aýlandykça döwran, döwür,
Ykbalyň ýüz küýe öwir,
Dura-bara dosty sowyr,
Garyp galan barsyz ärden.

Ite zer dök, minnet çekmez,
Aňlamaza sözüm ýokmaz,
Köňlüň islän işler çykmaz,
Nan ýagysy – kärsiz ärden.

Her göz säherde bidardyr,
Eýesinden ülüş bardyr,
Hak, pygamber, halk bizardyr,
Sözi ygtybarsyz ärden.

Magtymguly, many saçar,
Her kim söz lezzetin içer,
Bara-bara köňül geçer,
Täsibi ýok, arsyz ärden.