Wagt olar ki, bir ýel düşer serime,
Hyýal hüjüm eýläp, joşy ýandyrar.
Ýüregim joş berse, aklym jem bolar,
Pikir basar, gaýgy huşy ýandyrar.

Säher wagty derwüş nalyşa gelse,
Bilinden ýüp alyp, boýnuna salsa,
Taňry söýen bende bet doga kylsa,
Pelegi titreder, Arşy ýandyrar.

Akmak özün akyl bilen deň eýlär,
Bir iş tutar, soňrasyndan aň eýlär,
Zehiniň käýider, aklyň teň eýlär,
Diýdigiň eýlemez, naşy ýandyrar.

Hak söýüpdir Aly deýin welisin,
Gadym setdir yzzat etmek ulusyn,
Ýetmiş iki millet gömer ölüsin,
Segparaz milleti läşi ýandyrar.

Magtymguly, Hakdan pyýala çekse,
Pyýala joş berip, hyýala çekse,
Aşyklar bagryndan bir nala çekse,
Dagy elendirer, daşy ýandyrar.