Namart gapyl galar, öýünden çykmaz,
Hasrata ulaşar, jeň sesin aňsa.
Hak uran bendesi jenana bakmaz,
Ýaka tutar şol dem, zen sesin aňsa.

Ençeler gyşyny nowruz eýleýir,
Zagy tutup, kölde, gör, gaz eýleýir,
Pelek asman galyp, perwaz eýleýir,
Hundar gülüp bakar, jan sesin aňsa.

Bu pelek her kimi teşwüşe salar,
Gije gözelleri serhoşa salar,
Görüň bu zemini, tomaşa kylar,
Lahat gaza başlar, hun sesin aňsa.

Aryp bolan düzüp ötdi nakyllar,
Huşlar esgi, kütelipdir akyllar,
Görden çykyp geler boldy bahyllar,
Pany jahan içre kän sesin aňsa.

Diýerler: «Harteçjal jahana geler»,
Ne ajap nakyldyr, kim ony biler,
Misler aglar, tylla-göwherler güler,
Toprak içre ýatyp, zeň sesin aňsa.

Aryp  bolar dünýä ýüzün syçyran,
Selpäp gezer deşte malyn gaçyran,
Pelek urup, döwlet guşun uçuran
Zary-girýan aglar, han sesin aňsa.

Pelek keç eýlemiş ykbal gerdişin,
Aýrar boldy bir-birewiň gardaşyn,
Toprak bolan daglar göterer başyn,
Gözün ýaşlap garar, seň sesin aňsa.

Aryp galar gam öýünde ýykylan,
Haly zebun bolar ýeňňe dakylan,
Dyzdan kuwwat gidip, bili bükülen
Haka ýüz ýalbarar, nun sesin aňsa.

Magtymguly, galat boldy bu pallar,
Dert zyýat düşüpdir, zebundyr hallar,
Gije sergezdandyr tilki, şagallar,
Pil pakyr irkiler, tün sesin aňsa.