Oba ujundaky depe,
Eýerlenen ata meňzär.
Akylsyz ärler zer bilen –
Ýazylan bet hata meňzär.

Bu dünýä bir düýpsüz derýa,
Gark eder, bolma biperwa,
Magrur bolma maly-dünýä,
Gezekli nobata meňzär.

Gardaşsyza kuwwat ýokdur,
Ogulsyza döwlet ýokdur,
Aýalsyza eşret ýokdur,
Hoş güni hasrata meňzär.

Ýamandan ýagşy set bolmaz,
Asly ýagşydan bet bolmaz,
Dünýälikden döwlet bolmaz,
Ogul çyn döwlete meňzär.

Burç bilen duz täze ýara,
Awy gatar rozygäre,
Ýaman hatyn ýagşy äre,
Sowulmaz töhmete meňzär.

Ýatan ýeri ýylan goýny,
Asylany itiň boýny,
Pis äriň ýagşy hatyny,
Dürri-bigymmata meňzär.

Magtymguly, namyradam, 
Iller hoşdur, men näşadam,
Söz manysyn aňmaz adam,
Bir guýruksyz ite meňzär.