Köp ýigitler gelip, geçdi jahandan,
Niýetine görä ykbal bolmady.
Gerdişi keç gahba pelek elinden,
Ertiri şat bolan öýlän gülmedi.

Günde kepen biçer bu ajal − haýýat,
Bir beladyr, hiç gutarmaz bu saýýat,
Pelle-pelle aşak düşer adamzat,
Bu gün gördügimiz ertä galmady.

Nesihatym diňle, eşit bu sözi,
Bir degişhanadyr dünýäniň ýüzi,
Ajal ýetip, adam ýumulsa gözi,
Göýä bu jahana geldi-gelmedi.

Humaýun gorganyn saldyran Harun,
Hany dünýäni dört bölen Feridun,
Kyrk şähri gyzyldan dolduran Karun,
Gözi gumdan doldy puldan dolmady.

Magtymguly haýran, her ýana bakar,
Bu ne gudrat işdir, suwdan ot çykar?!
Ýagşy oguldan rehmet arygy akar,
Näletkerde ogul dogdy dogmady.