Ýa, Ýaradan Kadyr, gudratly Jepbar,
Armanda goýmagyl, ýa, Züljelalym.
Nebsimiň raýynda keremli Gapbar,
Permanda goýmagyl, ýa, Züljelalym.

Tenim dertli kylma, özümi gallaç,
Köňlüm giň et, goýma aj-u ýalaňaç,
Zalyma duş etme, namarda mätäç,
Gam mende goýmagyl, ýa, Züljelalym.

Saklagyl gaýgydan, gamdan, mähnetden,
Haly kylma dünýälikden, döwletden,
Namut etme şepagatdan, rehmetden,
Dermende goýmagyl, ýa, Züljelalym.

Eý-ä, Kadyr, Senden gudratly kim bar,
Keremiň güýçlüdir, günähim bisýar,
Bir zalym golunda eýläp giriftar,
Haýranda goýmagyl, ýa, Züljelalym.

Pyragy diýr, şer hem bolsa şanymda,
Haýra döndür, arman goýma janymda,
Owwal-ahyr, dost-duşmanyň ýanynda,
Şermende goýmagyl, ýa, Züljelalym.