Aşyklar ähliniň hany, soltany,
Tejelli tagtynyň şasy, galandar.
Gezerem ýollary ýitirip ony,
Bilmenem, habar ber, haýsy, galandar.

Men bu ýolda şunça zille bolmuşam,
Mande galyp, ejizligim bilmişem,
Şiblini, Mejnuny alyp gelmişem,
Pähliwan Pirýary, Weýsi, galandar.

Habar aldym bagy-bossan, gülünden,
Reňgi solmuş bady-hazan ýelinden,
Gerdany keç gahba çarhyň elinden,
Menewşe tutarmyş ýasy, galandar.

Hoşlugym bar oýnamaga, gülmäge,
Rakyp goýmaz dogrulyban gelmäge,
Bir hylwatda ýar habaryn almaga,
Sende bar aşnalyk ysy, galandar.

Gündiziň pikirdir, otdur agşamyň,
Bu resme geçirdim, wagtyn eýýamyň,
Ýa, Rep, kerem etseň bize bir jamyň,
Gymmatyn aýt, ne bahasy, galandar?

Söýseň ol Ýaradan Kadyr Subhany,
Men garyby şat eýlegin pynhany,
Göterdi älemi, tutdy jahany,
Aşygyň nalasy – sesi, galandar.

Magtymguly aýdar, ustuhan seniň,
Ten seniňdir, damar seniň, gan seniň,
Gymmat üçin akyl seniň, jan seniň,
Dodagyma tutgul tasy, galandar.