Niçäni geda eýlediň, pena dünýä, pena dünýä,
Aşygy jyda eýlediň, pena dünýä, pena dünýä.

Ýagşyny berdiň ýamana, namardy goýduň çamana,
Mert ýigit gitdi gümana, pena dünýä, pena dünýä.

Adyl şany güm eýlediň, ýurt-mekanyn gum eýlediň,
Karuna genç jem eýlediň, pena dünýä, pena dünýä.

Isgenderiň akdy saly, wagt ötdi, galdy ýoly,
Mejnuny sen kyldyň däli, pena dünýä, pena dünýä.

Isaga bir hary berip, altyndan Karun doýuryp,
Aşygy birewden aýryp, pena dünýä, pena dünýä.

Ýamany ilde han edip, namardy çyn merdan edip,
Binalary meýdan edip, pena dünýä, pena dünýä.

Baglar gülüni saraldyp, batyl gözleri köreldip,
Göwrümiň gysyp, daraldyp, pena dünýä, pena dünýä.

Nesimini tygda ýüzüp, aýyrdyň ilinden üzüp,
Uly ile kätip ýazyp, pena dünýä, pena dünýä.

Adamy ýüz hilä goýduň, halala haram harç uýduň,
Amanat janymyz iýdiň, pena dünýä, pena dünýä.

Şeýtan kylyp Azazyly, uzaltdyň ýakyn menzili,
Sende ýok döwran hezili, pena dünýä, pena dünýä.

Soltan Hupby gaýyp boldy, aýt, senden näme aldy?
Bir gün hazan ýeli geldi, pena dünýä, pena dünýä.

Saldyň Jemşidi ýer teýne, Karuny gysdyň öýüne,
Myralyny uýup oýna, pena dünýä, pena dünýä.

Ýagşylary ýaman etdiň, biwepany merde çatdyň,
Humar düzüp, baryn utduň, pena dünýä, pena dünýä.

Gelenler geçdi, durmady, hiç kes hem köňül bermedi,
Gedalar sapa görmedi, pena dünýä, pena dünýä.

Duşmany eýlediň rowaç, gazanda gaýnap garlawaç,
Garyp galdy, gör, ýalaňaç, pena dünýä, pena dünýä.

Ýamanlara kyldyň wepa, ýagşylara berdiň jepa,
Hiç kim-de sürmedi sapa, pena dünýä, pena dünýä.

Ýamany ýagşa güldürdiň, käriňi ile bildirdiň,
Magtymgulyny soldurdyň, pena dünýä, pena dünýä.