Ten kapasna giriftar, gel, jana nazar eýle,
Bak, köňül gözgüsine, janana nazar eýle.
Ybrat gözüni açyp, jahana nazar eýle,
Iki gämi tutmagyn, bir ýana nazar eýle,
Hiç kime baka bermez, döwrana nazar eýle, 
Döwranyna daýanan ynsana nazar eýle,
Bu gonup-göçüp baran kerwene nazar eýle.

Bu döwran içre köňül guşlary eýlär perwaz,
Göýä murgy-säherdir, şeb suhan eýlär agaz,
Bag içre bilbil olup, okar nagma hezar saz,
Hudaýa toba eýläp, dergähiňe döndüm baz,
Ömür az, döwran deraz, ne roza bar, ne namaz,
Oýan haby-gaflatdan, haşra meňzär pasly-ýaz,
Älem ne tesbih okar, her ýana nazar eýle.

Ölmes men diýp düşmesin, köňlüň bu güman içre,
Ömre ýokdur ygtybar, ötegçi zaman içre,
Ajal goýmuş ok-kezin, kirişe keman içre,
Bendäge ne armandyr, jan berse iman içre,
Sözle, sözüň ýaýylsyn bu ýagşy-ýaman içre,
Az ömre agyr işler gurup sen jahan içre,
Mukym işini tutan myhmana nazar eýle.

Ne hoş gündür aşyga hylwat ýara ulaşmak,
Hal-ahwalyn soraşyp, gol boýuna salyşmak,
Magşaryň neşri ýaňlyg ten, jan kimin buluşmak,
Bir-bire derdin döküp, sergüzeştin kylyşmak,
Tow berilen rişte deý çyrmaşyban-çolaşmak,
Dostlar ne müşgil işdir, gowuşyp, aýrylyşmak,
Wysala magrur olma, hijrana nazar eýle.

Magtymguly, sözlemeý goýmaz durmaga derdiň,
Ýalançyda ýaýlanyp, altmyş ýana el gerdiň,
Panyny baky bildiň, ýeldiň − ösdüň, ýüwürdiň,
Dostuňa azar berdiň, duşmana ýüz öwürdiň,
Bildiň ki biwepadyr, bahasy ýok bu ýurduň,
Otuz dört ýaşa geldiň, bu jahanda ne gördüň,
Gurhana gulak goýup, permana nazar eýle.