Namazhon derwüşler, döwletli baýlar,
Pelegiň gerdany keçdir, ýaranlar.
Minnet bilen kylnan namaz ýol almaz,
Döwlete daýanmaň, puçdur, ýaranlar.

Sykylsa burunlar, sararsa ýüzler,
Gurysa dodaklar, bolmasa sözler,
Gögerse dyrnaklar, alarsa gözler,
Imandan özgesi hiçdir, ýaranlar.

Aslyň bir owuç gum, dem bir nepesdir,
Özüňe bir dolan, işiň hebesdir,
Jeset bir menzildir, ten bir kapasdyr,
Jan bir gözi bagly guşdur, ýaranlar.

Gapyl bolmaň, dünýä gelen öterler,
Munda hoşwagt bolmaň, bardyr beterler,
Çekiler kerwenler, ýörir hatarlar,
Bir yzy üzülmez göçdür, ýaranlar.

Ajal ýakaň tutar, bir gün bagyrdar,
Giden gaýdyp gelmez, bu bir ugurdyr,
Menziller yrakdyr, ýükler agyrdyr,
Irteräk terpeniň, giçdir, ýaranlar.

Gutular sen Hak ýolunda jan berseň,
Hülle bolar silkip-silkip don berseň,
Saýa bolar mätäçlere nan berseň,
Bir aja nan bermek haçdyr, ýaranlar.

Bu dünýä diýgeniň iki warakdyr,
Ýarysy garadyr, ýarysy akdyr,
Bir gije düýş gördüň, ertiri ýokdur,
Dünýäniň tymsaly düýşdür, ýaranlar.

Magtymguly boýun goýgul bu emre,
Mala meşgul bolup, galmagyl gümra,
Ýüz ýyllyk tetärik bäş günlük ömre,
Akyl eýläň, niçik işdir, ýaranlar.