Ilim-günüm, ýakyn gözel gardaşym,
Niçe zar eýlesem, gulagyn tutmaz.
Ummana dönüpdir akdyran ýaşym,
Umman içre sallar erkana ýatmaz.

Gojaldy, esgidir ol ýaňňy sallar,
Ýoda ýitdi, ýörelmez boldy ýollar,
Lukmanyndan şypa gören, bak, gullar,
Tä ömri ötinçä ony unutmaz.

Bihesip, san ýetmez tutan pyraklar,
Asmandan zemine düşdi Byraklar,
Nakyl bardyr: «Daşa atylan oklar,
Daşa girer bolar, dolanyp gaýtmaz».

Doga kylsam, jebri-jepam ekserdir,
Ylm öwreden ussat − kyblam pederdir,
Adam bardyr, bir söz diýseň, äşgärdir,
Adam bardyr hamyn soýaňda aýtmaz.

Niçeleriň gül basandyr gözüne,
Niçeleriň syýa tartmyş ýüzüne,
Niçeleriň perwa bermez sözüne,
Niçäniň ýaman söz janyna batmaz.

Bu pelek bulady, gamçysy golda,
Niçäniň läşini dargadar ýolda,
Niçe ömri öter boldy ýüz salda,
Niçeleriň ömri bir aýa ýetmez.

Ajaýypdyr dursa ol Hak beren göz,
Diýer bolsaň, daýym sözlegin sen düz,
Uzak il içinde gezmez ýalan söz,
Ýaman niýet bilen uzaga gitmez.

Aňy ýokdur diýrler bir garny ajyň,
Gymmaty pes bolar ilde gallajyň,
Gül baldagy bolsa-da her agajyň,
Hak pata kylmasa, sünbüli bitmez.

Gider boldum ýigitlikde ýör bilen,
Her ýana çapyp men ýuka ser bilen,
Nalyş eýläp, sorar bolsaň zer bilen,
Tyllany neýlesin, pelek jan satmaz.

Magtymguly diýer, ýandy bu janlar,
Gojalypdyr gözüm gören jenanlar,
Ýola girmez, loly bolan zenanlar,
Il-güni ýygnalsa, oňa başartmaz.