Gara ganlar ýuwdup, hasratlar çekip,
Mala meşgul bola-bola gider sen.
Dodagyň tebserdip, ýüregiň ýakyp,
Gümanyň bar, bile-bile gider sen.

Munça jepa − ogul, gyz-u zen üçin,
Munça eşret − häk olajak ten üçin,
Gitmez garamaty iki gün üçin,
Neçün boýna ala-ala gider sen.

Magrur olma senjabyňa, samryňa,
Ajal − Dawut elin çekmiş demriňe,
Gylça jana bu bäş günlük ömrüňe,
Ne tetärik kyla-kyla gider sen.

Malyny küýseme berimsiz baýyň, 
Il gezdikçe, gözi doýmaz gedaýyň,
Mömin bolsaň, kyl gullugyn Hudaýyň,
Bäş wagt ýada sala-sala gider sen.

Magtymguly, habar bergin ederiň,
Her ýan barsaň, ajal almyş güzeriň,
Ýashana diýp, ýyglap geçdi pederiň,
Senmi mundan güle-güle gider sen?