Çowdur han, görejim, göwün diregim,
Sen wepat bolup sen zarlar içinde.
Gökleňde pälwanym, ile geregim,
Halky goýup gitdiň narlar içinde.

Gelebilmez idi badyňdan duşman,
Gelen tapdy gitdi zoruňdan puşman, 
Goja dagdan bäri − gökleňe aşman,
Bizi goýup gitdiň marlar içinde.

Pelek seniň gül ömrüňi soldurdy,
Hazan degdi, now gunçaňy ýoldurdy,
Gara daglar dözmeý, serin galdyrdy,
Çeşmin ýaşlar duman-garlar içinde.

Kime nesip etdi yspyhan ýaýyň,
Sözüm galat däldir, behiştdir jaýyň,
Gökleň, ýomut ― weýran boldy saraýyň,
Pelek weýran etdi harlar içinde.

Magtymguly, hemdem, akyl-syrdaşyň,
Tutabilmez özün, döküp gözýaşyn,
Duman aldy daglar kemerin, başyn,
Aý-günler batdylar zarlar içinde.