Eý ýaranlar, musulmanlar,
Jebirde ýörmeli boldy.
Niçe zähmet çeken janlar,
Jepany görmeli boldy.

Jahan giňdir, melamat kän,
Arada köýdi şirin jan,
Üstümizde rehimsiz han,
Bil, ahyr urmaly boldy.

Azypdyr gökleň hanlary,
Kän görer bize hallary,
Goýman sürdi bar mallary,
Göz dikip durmaly boldy.

Magtymguly, aýama jan,
Biliň guşa, geý gazap don,
Hetden aşdy bu zalym han,
Ahyr tor gurmaly boldy.