Ýedi ýaşan arap atyň şanynda,
Mälim bolmaz, depe nedir, düz nedir.
Ýüňi ýeten goç ýigidiň ýanynda,
Elli nedir, altmyş nedir, ýüz nedir.

Namart ogly gorky çeker meýdandan,
Agaç adam bolup görner her ýandan,
Muhannesler howply ýerde duşmandan,
Seçe bilmez, duman nedir, toz nedir.

Sypah bolup, müner atyn bilmeýen,
Aryp bolup, öz yzzatyn bilmeýen,
Söhbet içre söz lezzetin bilmeýen,
Aňa bilmez mejlis nedir, saz nedir.

Garga ýiter baz, balaman jeňinde,
Görne bilmez ol meýdanyň deňinde,
Aç garyçgaý, algyr laçyn öňünde,
Müň ýygylsyn, ördek nedir, gaz nedir.

Magtymguly, söz joş eder diliňden,
Muhannese ýol bermediň ýeliňden,
Bu hünärler geler, gelmez eliňden,
Dilden gelen bu jürýetli söz nedir?!