Belent daglar, beýikligňe buýsanma,
Güdazda suw bolan zer dek bolar sen.
Tereň derýa, haýbatyňa guwanma,
Wagtyň ýetse, guryp, ýer dek bolar sen.

Daglaryň arslany, babyr, peleňi,
Muş bile deň bolar pil, peşe jeňi,
Mejmegul-Bahreýniň, Niliň näheňi,
Gulagyna urlan har dek bolar sen.

Kyýamatdan bir söz diýdim baýakda,
Garaw bardyr ýersiz urlan taýakda,
Zalymlar hor bolar, galar aýakda,
Garyp, sen ýyglama, şir dek bolar sen.

Ýagşy bedew münen, hup mahbup guçan,
Bile eltipmidir bakyýa göçen,
Hakykat namartdyr imansyz geçen,
Iman bile barsaň, ner dek bolar sen.

Gerçe nesihatdyr illere sözüň,
Il almazdan owwal tutawer özüň,
Alymlara uýsaň, açylar gözüň,
Jahyllara uýsaň, kör dek bolar sen.

Lukman kibi dertli dermanyn berseň,
Rüstem dek döwleri permana salsaň,
Isgender dek ýeriň ýüzüni alsaň,
Ýere ýegsan bolsaň, ýer dek bolar sen.

Magtymguly, garap sözle daşyňy,
Jaýyn bilip sarp et bolsa aşyňy,
Kämil tapsaň, goý ýolunda başyňy,
Är ardynda gezseň, är dek bolar sen.