Eşek özün egsik saýmaz bedewden,
Gymmat etseň, at ýanynda bellidir.
Bedew diýgeç, hemme bedew deň bolmaz,
Çyn bedewler meýdanynda bellidir.

Oglanlykda bilmez idiň, beg idiň,
Ýamana hiç ýokmaz sözüň, öwüdiň,
Aryp bolsaň, aslyn sorma ýigidiň,
Edebinde, erkanynda bellidir.

Bu jahanda doýmaz gözüň sir bolmaz,
Her ýolbarsdan gaplaň bolmaz, şir bolmaz,
Ýigit diýgeç, hemme ýigit bir bolmaz,
Goç ýigitler myhmanynda bellidir.

Döwlet gonsa bolajagyň başynda,
Hemaýaty − ili gerek daşynda,
Ýigit özün mälim eder işinde,
Gylyjynda, zybanynda bellidir.

Magtymguly, garyplaryň gözýaşy,
Daglary ýandyryp, erider daşy,
Pakyra zulm eden zalymyň işi,
Rozy-magşar diwanynda bellidir.