Men Ýakubam, ahy-zary çekem, Ýusup diýe-diýe,
Gözlerimiň ganly ýaşyn dökem, Ýusup diýe-diýe.

Pelek aglar gözýaşyma, ne söwda saldyň başyma, 
Mejnun bolup dag başyna çykam, Ýusup diýe-diýe.

Her tarapdan jylga-jylga, bulut oýnar, salar kölge,
On iki dag, ýedi jülge sökem, Ýusup diýe-diýe.

Gitdi Ýusup, gelmez habar, turar men ýyglap her säher,
Gala-gala, şäher-şäher sökem, Ýusup diýe-diýe.

Meger Ýusup düşdi çaýa, jemalyň diýp bakam Aýa,
Yrak zemin Kerbalaýa bakam, Ýusup diýe-diýe.

Hasratyma pelek ýyglar, aşyk boldy dilsiz zaglar,
Perhat bolup beýik daglar ýykam, Ýusup diýe-diýe.

Ýusup gezer dilden-dile, şeýda bolup çölden-çöle,
Sorag salyp ilden-ile çykam, Ýusup diýe-diýe.

Öter eýýam döne-döne, geçer bu jan ýana-ýana,
Erte, agşam Aýa, Güne bakam, Ýusup diýe-diýe.

Magtymguly, dost ýüzünden, durmaz, ýaş akar gözünden,
Bilbil bolup ýar sözünden okam, Ýusup diýe-diýe.