Aşyklar Hak yşkynda,
Haýrandadyr-haýranda.
Gözler zagyf yzynda,
Girýandadyr-girýanda.

Kyldy oňa Hak rehmet,
Nury-tejelli gudrat,
Hyrka geýen Hoja Ahmet,
Saýramdadyr-Saýramda.

Ýerden çykan agaçlar,
Dili senaly guşlar,
Suhan söýen derwüşler,
Döwrandadyr-döwranda.

Aýyl, aşygym, aýyl,
Mejnun bol, halka ýaýyl,
Halyl ogly Ysmaýyl,
Gurbandadyr-gurbanda.

Tur dagynda duranlar,
Niçe gaýyp erenler,
Jemalyňy görenler,
Permandadyr-permanda.

Dolduran bu dünýäni,
Sözlän her du jahany,
Külli işiň beýany,
Gurhandadyr-Gurhanda.

Magtymguly, aç diller,
Gulluk kyl aýlar, ýyllar,
Erte gulluksyz gullar,
Armandadyr-armanda.