Adam ogly, seýil kylsaň,
Dünýäde dükan görüner.
Bu panyga nazar salsaň,
Ýuwdarha jahan görüner.

Isgendere torun guran,
Süleýmana arza baran,
Karun, Harun ― baryn uran,
Ol pelek pälwan görüner.

Jebir görüp, ýanan janlar,
Çäre tapmaýan dermanlar,
Dünýäde çohdur ummanlar,
Bäş sany umman görüner.

Serine duman bürenen,
Gözýaşy ýerde süýrenen,
Mähirli, daşdan görünen
Daglarda duman görüner.

Çyn-Maçynda tagtyn guran,
Eýrany, Owgany soran,
Hindistan, Hotana baran
Atanyýaz han görüner.

Dag serinden güzer salsaň,
Ol ýerde ýurt eýläp galsaň,
Şol jaýyňdan nazar salsaň,
Ulug Dehistan görüner.

Perde tartyp ýüzlerime,
Raýyş berip sözlerime,
Magtymguly, gözlerime,
Ýeke Meňli han görüner.